Il-Kumitat Eżekuttiv tal-Għaqda Ġurnalisti Sports jilqa’ lit-tnax-il żagħżugħ/a li qed jieħdu sehem fl-AIPS Young Reporters Programme, li qed isir bħalissa f’Malta fl-okkażjoni tal-UEFA Under-19 Championships Malta 2023. L-Għaqda Ġurnalisti Sports tawgura lill-parteċipanti kull suċċess f’dan il-kors kif ukoll btala pjaċevoli fi gżiritna.

L-AIPS Young Reporters Programme, bla dubju huwa opportunità kbira għal dawk il-ġurnalisti żgħażagħ li jkunu jixtiequ gradwalment jidħlu fl-industrija tal-ġurnaliżmu sportiv. L-Għaqda Ġurnalisti Sports hija rrappreżentata fl-AIPS Young Reporters Programme miż-żagħżugħ Ryan Cauchi, li t-tir tiegħu huwa li jsir ġurnalist sportiv u li huwa wieħed mill-parteċipanti f’dan il-programm.

Il-preżentazzjoni taċ-ċertifikati tal-AIPS Young Reporters Programme Malta 2023 se ssir is-Sibt, 15 ta’ Lulju, fejn ser jippreżentaw il-President tal-AIPS, is-Sur Gianni Merlo u l-President tal-AIPS Europe, is-Sur Charles Camezuli, flimkien mas-Segretarju Ġenerali tal-Għaqda Ġurnalisti Sports, is-Sinjura Lorraine Cunningham li se tkun qed tippreżenta ċ-ċertifikati lill-kandidati li jkunu temmew il-programm b’suċċess.

L-AIPS Young Reporters Programme Malta 2023 qed jkun immexxi mis-Sur Riccardo Romani u mis-Sur Martin Mazur.

Ritratt: Il-grupp tal-parteċipanti tal-AIPS Young Reporters Programme. Fuq (Mil-lemin għax-xellug): Ryan Cauchi (Malta), Andrew Dempsey (Irlanda), Tomáš Plavecký (Slovakkja), Tor Henrik Fredriksen Stensland (Norveġja), João Sampaio (Portugall), Camila Alves (Brażil), Costanza Marsili (Italja). Isfel: Emmanuel Ayamga (Ghana), Guðmundur Aðalsteinn Ásgeirsson (Iżlanda), Alba Reinado (Spanja), Panagiota Chalkia (Greċja), Konrad Witkowski (Polonja).